مساء الخير عليكم جروبنا العزيز....من مكتبى القابع ببيتى القابع بشقتى
القابعة بالحتة اللى انا فيها ...احييكم ..واتمنى تكونو جميعا بخير وتكونو
مستحملينى علشان انا فعلا غلست جدا و بقيت لا اطاق ..بس جزاء الصبر الجنه
..ومازلت اشكر كل الناس اللى بيبعتولى رسايل شكر ..و اوعدكم بالاستمرار فى
التركيبات و الوصفات النافعة المفيدة ..لانه كما قيل خير الناس انفعهم
للناس ...و باذن الله قريبا سيكون هناك مركز للاستشارات و بعض المنتجات
..اتمنى ان يلقى اعجابكم..احنا قربنا على الالف اهو ..و بنجرى بسرعة
النملة النفاثه ..احمدك يا رب ....اللى يهمنى ليس العدد انما الاستفادة
_______________
انهاردة
تركيبتنا للشفايف ....اه للشفايف ...وعلى راى الشاعر العظيم بؤووو..حينما
وجد شفايف حبيبته مشققة ..فتبعلك منها ..ثم استنحر ..فلفظ عقبوله الازعر
...و زرعط بثمانينه ...و تعصفر ..و تبنصر ...ثم قال ..يا ليتها كانت مقشفة
الشفاه ..لكن حجم الفم فيه الفيل تاه ...و تدور الايام دورتها و تصبح
الشفايف المبرطشة موضه ...حتى انك تجد الفتاه لا تتكلم من خيشومها بل من
طرف الشفاه ..فتمدها و تمطها و تدلى بها فى الصحف ...حتى قال شاعر
الجليلين و اعجوبه القرن الافريقى ..حكاشة بن نشفان البرطوشى :من لى
بمقطوع الشفايف..فى كل وشها غير الشفايف لست شايف ...و يخرب بيتك يا قاسم
يا حزين ...وريتنا الشفايف و القرايش و الهوايش و الهوايف ...وكفى يا عين
عن السكاح...
______________
ماسك دهان للشفايف ..لزيادة نضارتها و
علاج جفافها و اعطاءها شكل و لون طبيعى و براق و احمر و جميل ..مناسب خاصة
للعرايس و اللى قطر الغلب دايس :
يتركب الماسك الدهان من :
معلقة كبيرة طين مغربى ..او كاولين لو موجود
معلقة زيت زيتون صغيرة
معلقة عسل نقى صغيرة بس يكون غير متجمد
معلقة كبيرة ماء ورد
***دفى ماء الورد قليلا فى حمام ماء....اضيفى العسل ثم زيت الزيتون
***اضييهم للطين او الكاولين ..و ادعكى جيدا للوصول الى عجينة جميله ..
***ضعى العجينة على الشفايف لمدة دقيقتين فقط...ثم اغسليها بالماء الدافىء..ثم استخدمى بعدها ملون الشفاه
**طبعا يفضل ان يكون المعجون دافىء نوعا ما
تحياتى لكم جميعا واتمنى لكم ...صحة مع الطبيعة
ملحوظة:يمكن معرفة معانى المفردات اللغوية الغريبه من معجم ..سنع الحوافز وسيل القنافذ ..لابن السبهللى الممقوت
د.حكبم زمانه
الجمعة نوفمبر 07, 2008 9:13 pm