الراجل
داخل بيته فى اول يوم فى رمضان المبارك جايب اللحمة و الفراخ و الكنافة و
القطايف و الفزدق و البندق و الذى منه ..مراته قالت له يا حج هنعمل كل ده
..قالها اعملى اعملى يا وليه ..على راى الشاعر اطبخ طبيخ اليوم و اليومين
..وابلع حتى تدمع العينين..الوليه صعبان عليها الراجل بطنه بتتنفخ زى
البالونة..وبيقعد يكاكى طول الليل و يقول يا ريت اللى جرى ما كان ..انا
اللى جبته ده كله لنفسى و المطافى تيجى و النقل العام يقف و مشكله ..عمنا
الحج مصمم ده اول يوم فى الشهر المفترج وكأن الشهرالمفترج شهر البلع و
النفخان مش شهر الصوم و الغفران ..عملت ستى الحاجة اللحمة و اليخنة و
الباردة و السخنة ..والحج نازل بلع ..ورفع على البلاعة اللى مسميها بؤ
صفيحة الكنافة قصدى صنيه الكنافة ..وهاتك يا بلع ..ورمى قالب البسبوسة فى
بؤة مع اربع شفاشىء عصير ...وراح الزبون فى غيبوبة ...ثم اخذ يهلوس و يقول
....صنعت لنا اكلا كثيرا جامدا **فبلعت منه كما يبلع المفجوع **وشربت من
العصير كثير شفاشىء**فأصبت بالاتخام بعد الجوع
فالله يخرب بيت مثلى انه
**رجل طفيس سافل جربوع ...والحمد لله تمت السيطرة على النيران ..بمساعدة
الدبابات و الطيران ...بس يا ريت ..متتكررشى تانى ..يا جدعان ..
رمضان
يا جماعة شهر التخلص من النفايات المتراكمة فى الجسم طيله العام بالصوم
..مش شهرالبلع و اللقف و الرمى عمال على بطال ..شهر الصحة قلبناه شهر مرض
..شهر الهضم قلبناه شهر اسهال ..شهر التوفير قلبناه شهر ديون و سلف ..ربنا
يستر
النهاردة الجزء العملى من الاعشاب و الهضم فى رمضان ..نحاول
نعمل تركيبة للراجل اللى كان هيفطس مننا ده ..تركيبة لعسر الهضم و
الانتفاخ و التخمة و تخمر الغذاء ..تحس كدة ان الاكل واقف فى المعدة زى
قالب الطوب ..واحيانا تتغير رائحة الجشاء ..التكريعة يعنى ..الجسم بيستغيث
يا رجاله ..وكنا اتكلمنا عن الاعشاب و خصائصها المرة اللى فاتت ..
عاوزين فى التركيبة دى ((مضاد للتخمر+طارد للريح+مهضم +مضاد للتقلص)) يبقى كدة تمام ..يبقى الآتى :
اجمل مضاد لتخمر الغذاء هوة النعناع الفلفلى لو مفيش يبقى البلدى بس طبعا فى فرق 30%من التركيبة
اجمل طارد للغازات على الاطلاق هوة الكمون 25%من التركيبة
احلى مهضم على الاطلاق هوة الزنجبيل 15%من التركيبة
اجمل مضاد للتقلص على الاطلاق هوة البابونج او الكاموميل وده 30%من التركيبة
اطحن
الجميع و اخلطهم كويس شيلهم فى بطرمان زجاجى فى مكان معتم ...استعدادا
لنابالم رمضان ..اول متجيلك الحالة ..قصدى الانتفاخ و عسر الهضم والتخمة
...خد معلقة صغيرة مليانة ..حطها فى كوب ..صب عليها ملو كوب ماء مغلى جدا
...سيبه ربع ساعه ...وريح بطنك وفش البالونة ...لو حسيت بشويه حموضة خفيفة
..خد تلات اربع حبات شمر و امضغهم مع التركيبة ..هتدعى لى ..طبعا لو حموضة
مزمنه يبقى ليها كلام تانى ...
وربنا ميجيب نابالم ...وصوما متقبلا ..و افطارا ..مهضوما
د.حكيم زمانه
الأحد أغسطس 31, 2008 2:28 pm