ازيكم وكل سنة و الجميع طيب و باحسن حال ..ورمضان الجاى ان شاء الله تكونو
اساتذة فى علم التراكيب و الاعشاب ..وعلى فكرة يا جماعة انا حطيت كل
التركيبات مقسمة حسب الوظيفة و موضع الاستخدام من الجسم لان عدد كبير من
الاعضاء كان بيجد صعوبة فى البحث عن تركيبة معينة او توبيك معين ..وخليته
كله فى منتدى حكيم زمانه تحت اسم ((وصفات الجروب)) عارف ان المسالة بتحتاج
تسجيل و مش عارف ايه بس مش هياخد منكم دقايق ..
امر تانى برضو ..بعض
العضوات المحترمات قالت لى يا حكيم انا جيت اعمل الشامبو ففصل منى ..شامبو
الشعر المنزلى اللى كنت بعته مرة ..وعاوز اوضح نقطة يا جماعة ..انى اعطى
مقادير تقريبية لان مسالة بيضة او ملو معلقة ده مش فى علم التركيب خالص
...انا بقول تقريبا علشان الموضوع ميبقاش سايب ..وهدفى ايضا انكم تعرفو
تتصرفو فى التركيبات ..انتى عملتى التركيبة وطلعت خفيفة ..زودى الشامبو
سنة ...قللى الخلاصة حبة ..وبجد لو مشيتو خطوات صح مش هيطلع الا كويس
..كان دايما دكتور جيمس ديوك احد اشهر العشابين الامريكان يقول ..انى
اتضايق حينما تطلب منى امراة مقاديرا لوصفة ..يكفى ان تعلمى ان هذه
التركيبة مفيدة بهذه العناصر ثم استخدمى حواسك للتمييز ..معنى كلامه طبعا
...وانا اتفق معاه تماما
نرجع مرجوعنا ...ونكمل كلامنا عن التقشير
الطبيعى ..وقلنا مقدمة شوية علمية علشان نفهم يعنى ايه مقشر و ليه
بنستخدمو و اهم المقشرات الطبيعية ....خلصنا الشق النظرى باختصار نيجى
للشق العملى ..وهوة ازاى اعمل الماسك كدة ..وازاى اغير فيه و اضيف
ليه..واعدلة و اقويه ..
لازم نعرف انى بحتاج التقشير غالبا لوجه فيه
اثار حبوب او كلف و نمش بغرض ازالة الطبقة الخارجية المبقعة و اتاحة
الفرصة للطبقة الجديدة للنمو بطريقة سليمة و نضارة ....نطبق النهاردة بعمل
ماسك للوجه مقشر لعلاج اثار الحبوب او الكلف و النمش ..بس لازم نعرف انه
الماسك مش محتاج مقشر بس ..كمان محتاج مبيض وملطف ولو اضفنا له مضاد
للاكسدة يبقى حاجة ممتازة
اولا ناخد المقشر بتاعنا ونخليه مش حاجة واحدة لا اكثر من حاجة ؛
3 ملاعق كبيرة لبن رايب
3 ملاعق كبيرة معصور البابايا
3 ملاعق كبيرة معصور الاناناس
3 ملاعق كبيرة عصير قصب
نصف تفاحة
ثانيا ناخد المبيض بتاعنا
2 معلقة كبيرة عصير ليمون
2 معلقة كبيرة زيت خروع
ربع ملعقة صغيرة كركم ناعم جدا
ثالثا الملطف و المغذى للخلايا
مطحون الشوفان الخشن ...ده فى حالة سكروب ..او المنخول فى حالة الماسك العادى ...وده كمية كافية لعمل ماسك ..
رابعا مضاد اكسدة لطيف ومنعش و مضاد للالتهاب و مضاد للبكتريا هوة
معلقة صغيرة مطحون النعناع الفلفلى
الخطوات
طبعا واضحة ضعى المقشرات سويا و اضربيها جيدا ....اضيفى عصير الليمون و
زيت الخروع و اخفقى للتجانس ..اضيفى الكركم و النعناع و الشوفان حتى تحصلى
على اروع ماسك مقشر فيكى يا بلد..ومزيل لاثار الحبوب تدريجيا بالتقشير و
للكلف و النمش بنفس الطريقة ....و لا يستخدم اكثر من مرتين اسبوعيا ..
....اللى
فات ده اللى انا بعمله دايما ....انتى يا شيريهان ممكن تغيرى بالاضافة و
الحذف ..وانتى يا بشمهندسة ممكن برضو تديلنا مثال اخر ...عاوز اشوف اضافات
و مناقشات ...لان ده هوة الاسلوب الامثل لتكوين ملكة التركيب ...وعلشان
كدة بنعمل ورش العمل ..ويا ريت تجربو و تقولو لى ...وشكرا جدا ليكم
وكل عام و انتم بخير
د.حكيم زمانه
الأربعاء أغسطس 27, 2008 2:45 am
