ركزو معايا انهاردة شويه ...حبة علم كدة مش هنقضيها تكهكهة..اهى ضحكت اهى
من اول كلمة ..بصى هنا يا شيريهان و بطلى ضحك عاوزين نركز...ونتى يا
بشمهندسة منى ركزى هنا و بلاش هزار فى التهريج علشان ميقلبشى بضحك..
النهاردة
هنحاول نعمل مع بعض ..ماسك من اقوى المقشرات الطبيعية ...طيب ليه المقشرات
و ليه الطبيعية ..اولا ليه نقشر جلدنا هوة احنا تعابين لا سمح الله ..لا
طبعا... طبعا الحريم بما انهم حيات ..عايشين يعنى متوزؤريليش يا ياسمين
..ماخوذة من حية يعنى على قيد الحياة ..مش حية يعنى بتقرص...والرجال كمان
بما انهم احياء...بنتعرض لعوامل بيئية خارجية ...هوا و تراب و دخان و غبار
و غيرة كل ده بيترسب على الطبقة الخارجية من الجلد و يسبب موت بعض الخلايا
او فقدها لبعض خصائصها المفيدة الحيوية ...و من الداخل برضو عمليات الهدم
و البناء و الحرق و غيره تؤدى لتولد العوامل الحرة ..بيسموها فرى راديكلز
ودى نشطة جدا و تسبب ايضا فقد لبعض خصائص ومرونه خلايا البشرة الخارجية
..واحيانا الداخليه ..كمان طبعا السن ..من اول ما سيادتك تبتدى تعدى
الخمسة و عشرين يبتدى الفار يلعب فى عبى ...قصدى يبتدى الجلد يتغير
للاسوأ...بس عند الاربعين باة تبتدى التغيرات الهرمونيه تلعب دور هام جدا
..وتفقد الانسجة مرونتها ...ويقل سمكها و تبان بعض الشعيرات ..ويبقى شكلك
ياااااى خالص ...كمان حضرتك الشمس ومحكيلكومشى عن شمس القاهرة وانتى
سيادتك بتجرى ورا ميكروباص ...و الشنطة وقعت ..وضاعت فلوسك يا صابر..طبعا
صابر صبره نفد...وهيغير اسمه قريب....
فى كل الظروف دى تحتاج البشرة
للمقشرات و المجددات ..اصل العمليه مش انك تقشرى ..منتى ممكن تقشرى بصل او
توم و تريحى نفسك ...وتطفشى الراجل بالمرة ..ودى رساله نبيلة فى حد ذاتها
...ولكن احنا عاوزين نقشر الطبقة الخارجية و نجدد الطبقة الداخليه ....هوة
ده دور الماسكات المحتوية على انزيمات التقشير و احماض الفاكهة اللى
بيسموها الفا هيدروكسى اسيد و يتفزلكو علينا و يقولو اى اتش اى ...A.H.A
علشان بس تبقو فاهمين الموضوع شغال ازاى ...مش كل واحد يقعد فى قناة فدائية ..ويركن على جنب ..و يعملنا فيها ارفس برجلى ...
طيب
يا حكيم بيه ...ايه وظيفة باة الانزيمات و احماض الفاكهة دى ....اقولك يا
خالتى ..الانزيمات بتتخلل الطبقة الخارجية وتحلل الخلايا الميته و المواد
الغير حية العضوية .....وبعدين احماض الفواكه تتغللل جوة ..وتقوم بنفس
الوظيفة بالاضافة الى انها كمان بتخليها تمتص رطوبه وبالتالى تزداد
مرونتها وازدياد المرونه دى حاجة ممتازة جدا لانها تخليها تفقد كرمشتها
وتتملى كدة و تبقى حية و ناضجة و شابة ...فهمتى يا شابة ؟؟ وطبعا كمان
تحفز انتاج الكولاجين الطبيعى ...لانك اوعى تصدقى ان اى منتج يحتوى على
الكولاجين من برة هيفيدك ..دى خدعة سينمائية ..لازم كولاجينك يكون من
جواكى ...
عارف انى طولت بس انا عارف ان الجروب اصبح فيه ناس فاهمة
احسن منى بكتير ....ولازم نتخصص شويه علشان تعرفو انى واد حاصل على
بكالوريوس صيدلة وكدة...
طيب ....وطبيعى ليه يا حج حكيم .....لانه
بصراحة المقشرات الكيماوية بتبقى قوية جدا على البشرة و عالية التركيز
...وبتعمل التهابات فى البشرة ...وقريت فى بحث انها سبب من اسباب شيخوخة
البشرة لتاثيرها القوى جدا ...وعاوز اقول ان التقشير الكيماوى لابد ان
يجريه طبيب متخصص وكفء و مدرب جدا ....شوفو كم وصف ..حتى لا يكون ضرره
اكبر من نفعه ..
طيب هنجيب الطبيعى ده منين ...انزيمات و الفاهيدروكسى اسيد و وواحد راكز على جنبه .....اقولكم انا..
اولا:الانزيمات
المحللة للخلايا الميتة ودى متركزة فى احلى و اجمل فاكهتين للتقشير
...فاكهة البابايا او بيسموها الباباظ ....ودى منها صابون البابايا
الفلبينى الشهير ....شوفتو الفهم حلو ازاى ....ودى بتحتوى على انزيم
البابين ..انزيم جميل و محلل ..للبروتينات اللى مكونة للخلايا الميته
..الفاكهة التانية هيه الاناناس الرائع ....وده بيحتوى على انزيم
البرومالين وده نفس وظيفة السابق ...
ثانيا : احماض الفوالكه او الالفا هيدروكسى اسيد ودى
حمض السوربيك فى الاناناس
حمض الماليك فى التفاح
حمض الترتريك فى العنب
حمض اللاكتيك وده فى اللبن و الرايب بالذات
حمض الجليكوليك وده من قصب السكر وده يعد من اقوى هذه الطائفة وله فوايد كبيرة جدا فى البقع و النمش و غيره
ده
كلام كان لازم يتقال علشان الناس تكون فاهمة الدنيا ماشية ازاى ....وهوة
ده علم التركيب ..علم التركيب مش خلط و بس ..لا ..دى فهم لحالة ..فهم
لمادة فعاله ....فهم لندل و ندالة ..قصدى لتركيبة متقاله ...و فعلا مش
هقدر اكمل لانى طولت عليكم ..ونعست كمان ...وبعدين نخلى الماسك بكرة ..
...واتمنى مكونشى صدعتكم بكلام مجعلص ....وبطلى ضحك يا شيريهان و وابقى
عرفينى اخبار الباتيناج ايه
شكرا لكم وصبركم الله على بلواكم
د.حكيم زمانه
الثلاثاء أغسطس 26, 2008 11:26 am
