عضوة عزيزة عليا ارسلت لى طلب ..بتقول لى متكمل معروفك يا عم حكيمو وابعت
لنا وصفة للكالو ..بسرعة قلعت ..الل,,قصدى خدت الورقة و القلم ..وقلت لا
يذهب الكاللو الشديد من القدم ...حتى يجود حكيمهم بالوصفة ..وحكيم زمانه
تحت امر السيادة ..وصفات بالطلب يا رجاله ...انا هعمل كشك فى ميدان
التحرير ..واسميه حكيمو للوصفات البريمو ...يمكن ربنا ينفخ فى صورتة ويبقى
كدة كبير و مشهور زى احمد شديد اللى شد حيله علينا ...ههههههه..طبعا
الكاللو من مشاكل الشعب المصرى المتاصلة من ايام الفراعنة ...وكاللو تعنى
بالفرعوني ((كالل للووو)) اى هياكل لو لقى بس هوة مش طايل ياكل ..ولو من
حروف الحزء و المزء ..مش عارف ايه دخلنى فى اللغة و النحو و الصرف ..خلينا
فى الصرف بس بما انه لسه مواسيره مركبتش ..
الكالو خلايا ميته تتكون
بفعل الضغط و الاحتكاك ...ده ببساطة شديدة جدا علشان المتخصصين ميزعلوش
منى ...الجروب كلها اطباء و صيادلة لابدينلى فى الدرة ..كل ما اكح
..يستفسروا ..وربنا يستر من اللى فى بالى ...ويجعل كلامنا خفيف عليهم
هوة
برنامج مش وصفه ..لان مش ممكن الجعلوصة اللى فرجلك دى تروح بتركيبة
...عارف ان فى فى الصيدليات تركيبات ..بس برضو لازم معها تعمل شويه حاجات
...
البرنامج يتكون من التالى :
*كمية كافيه لنقع القدمين طبعا من الماء ..احسن واحدة ناصحة وطبعا ماليين الدنيا تحط جاز ...
*معلقة كبيرة ملح انجليزى
*معلقة كبيرة بيكنج صودا
____________________
*عصير ليمونة
*معلقة صغيرة خل تفاح
*معلقة صغيرة زيت خروع
______________________
*معلقة كبيرة بودرة عرق السوس المطحون ناعم
*معلقة كبيرة زيت سمسم
__________________________________
*ضعى البيكنج و الملح الانجليزى فى حمام القدمين الدافىء...ضعى قدميك عشر دقايق ..ثم اخرجيها
**اعجنى عرق السوس بزيت السمسم و اعملى فرك قوى للكالو ...لمدة خمس دقائق ثم اشطفيه بالماء .
***اغمسى
قطعه من القطن فى مخلوط الليمون و الخل و الخروع الممزوج جيدا ...ركزى
المحلول فى القطنة ...ضعيه على الكالو ..شدى عليه رباط بلاستر و اتركيه
طوال الليل .
....برنامج ميخرشى الميه ....و بعضه كافى للتقليل من
الكاللو بطريقه جيدة ..ولكن لتتاكدى من ذهاب الكاللو بغير عودة افعلى ما
قلته لمدة اسبوع ....
تمتعى برجلين بلا كاللو .....وهاتى فانوسك الجديد
.اللى جوزك مجابهولكيش __انا بهدى النفوس_..وغنى ورايا .....حاللو يا
حاللو ...وحكيمو هيودى الكاللو
شكرا لكم ..وربنا يصبركم عليا
د.حكيم زمانه
الأحد أغسطس 24, 2008 6:49 pm