السهر يا جماعة وحش جدا ...قلب النظام اوحش ..اعوذ بالله مش قلب النظام
اللى فى بالكم ...حاشا و كلا ثم لماذا ..اعنى بوضوح علشان السيد بيه قشطة
ميفهمنيش غلط ..اعنى الناس اللى بتقلب ليلها نهار و نهارها ليل ...تغيير
الساعة البيولوجية الطبيعية يؤدى الى خلل جبار فى النظام الهرمونى و نظام
افراز الميلاتونين الطبيعى الذى يؤدى بدوره الى مشاكل حياتيه غريبه منها
بدء ظهور التجاعيد وبدء ظهور الهالات السوداءوبدء ظهور اعراض التعب
المستمر ..تلاقى الواحد تعبان ومش عارف هوة تعبان ليه مع انه نايم لما
المرتبه اشفطت مع طبعا مشاكل فى النوم ..هوة كدة ..ربنا خلقنا كدة ..وخلق
النظام كدة ..النظام الصحيح تنام بدرى و تصحا بدرى ..عارف ان ده مش ممكن
فى كثير من الاحوال بالذات فى ظروف الرخا السايد و الفلوس اللى بالكوم
..ومين يجيلو نوم ...بس لازم على الاقل تناملك و تنامى لك تلات ساعات قبل
الفجر ...طبعا عامل آخر ضار جدا هوة عدم تناول الخضروات و الفواكه بانتظام
و بصورة دوريه و قبل الاكل على اصح النظم العالميه ...قبل الاكل ؟؟؟آه قبل
الاكل قبل متتغدى كدة بساعتين خدلك موزايه و تفاحاية وقوطايه _طبعا
بالواو_احسن تفهمونى غلط و الخضروات مع الاكل طبق سلطة محترم فيه الخيار و
الخس و الجرجير وعلى راى المثل الشهير فى بلد جرجريا العظمى ...لو يعلم
الرجل ما فى الجرجير ..للف الربطة فى منديل حرير ...وفى بلدة جرجرينا
الوسطى ..لو يعلم الرجل ما فى الجرجير لعمله تمثال فى ميدان التحرير
..طبعا ميدان التحرير اللى عندهم ...عامل آخر صحى هام هو عدم تناول وجبات
متكاملة الشاب و البنت اليوميندول يدخلو المحل يدوها سندوشت جعبربر وشقتين
هوت دورج..وصاروخ شاورمة بالمنتوفلى ..يخرب بيت كدة ..تتخيلى انك اكلتى
حاجة ..لا طبعا ..وبعدين ..شعرى بيقع يا حكيم ...وسطى بيوجعنى يا حكيم
..عنيا اسودت يا حكيم ...طب انا ذنبى ايه انتى اللى مرعبه ..هههه سورى
..تهريجة علماشى ..خلى وجبتك متكاملة بروتين و نشويات و دهون مع الخضار و
الفاكهة اتحداكى لو سقطلك شعر و لا اتعرى لك غطا ..قصدى و لا اسود لك جلد
..طبعا انا حبيت بس اعمل المقدمة دى لانى كل مرة محتاج اكررها لكل بنت او
شاب يسالنى ...اعتبريها قواعد تغذويه حكيمية منطقيه..طبعا دى غير وزارة
الدفاع الامريكية
البنات هرونى على اسودادما تحت العين اللى بيسموها
الهالات السودا ...وكنت قدمت قبل كدة برنامج بس طبعا البنات فافى خالس
..ومش عارفين يعملوه ..او بالاحرى مكسلين ..جبتلكم وصفه اسهل ...بس بالطبع
مش اقوى ..بس هتساعد جدا ...وهيه وصفة هندية مع بعض التعديلات منى ..
تتكون التركيبة من الاتى :
عصير نصف خيارة
عصير طماطماية متوسطة
نصف معلقة صغيرة كركم مطحون
معلقة صغيرة عصير ليمون طازج
4 ملاعق كبار او خمسة حسب القوام مش قوامك طبعا كما اكرر قمح مطحون
قليل من نشا الذرة
طبعا استخلطى عصير الخيار و الطماطم و صفى القشر و الشعر قصدى البذر
اضيفى الكركم و اليمون و اخلطيهم جيدا مع العصير
اضيفى الدقيق مطحون القمح يعنى و اخلطيهم ..
اضيفى نشا الذرة للحصول على تجانس جيد للتركيبة
ضعيه تحت العين بواسطة قطنة او غيره ..اتركيه عدة دقائق ثم اشطفيه بماء دافىء
انصح معها ايضا بفيتامين سى اللى قلته فى البرنامج السابق لانه عامل هام جدا ....
تركيبة سهله ..وقويه ...ويا ريت نلتزم بالقواعد اللى قلتها ..لتنعمى ببشرة افضل و كراميش اقل
د.حكيماب زمانان
بما ان الوصفه اصلها هندى
الأحد أغسطس 24, 2008 6:28 pm