بذور الكتان ..مقال قديم

انا شوفت انكم مش عارفين اد كدة عن بذر الكتان وشفت ناس كتير بتبالغ فى فوايده فى التخسيس حبيت اديكم نبذه علمية من واقع التجارب و الابخاث ...
1-اولا اسمه باللاتينى يعنى بالعربى بالغ النفع وده دليل على فوايده
2-اهم مكوناته التغذوية و العلاجية من واقع التحليل كالاتى اوميجا 3 وده حمض دهنى غبر مشبع وليه فوايده عاليه جدا هنذكرهاومنجنيز والياف و مغنسيوم واملاح الفولات الهامة والنحاس و الفوسفور وكل حاجة من المكونات ليها فايده كبيرة خصوصا انه بيحتوى نسبة عالية منها ...تعالو نشوف الفوايد باة من غير مبالغه من واقع الابحاث و النتايج الصحيحة ...
3-الفوائد الصحية الثابتة علميا :
--طبعا هوة غنى جدا بالحمض الينوليك وده اوميجا3 دهنى وده اللى بيتحول الى اوميجا 3 الغنى بفوايدة واللى موجود برضو فى زيت السمك ولذا يعتبر البذور بديله عن زيت السمك وده طبعا بتؤيده ابحاث كتيرة جدا ومش عاوز ادخل فى تفاصيل ...طيب ايه يا حكيم فايد المركب ده ..اقولك انه مفيد جدا فى الاتى باختصار ومنعا للملل
*طبعا الاوميجا 3 دى بتتحول لمركبات اسمها بروستاجلاندينز بس من النوع واحد و تلاته مش اتنين و دى لها دور فعال جدا فى مقاومه الالتهاب على عكس النوع اتنين اللى بينتج من زيوت تانيه زى زيت الذرة و النخيل وزيت دوار الشمس الجوز الهند ...يبقى فايده ممتازة فى حالت التهاب المفاصل الروماتيزمى وعلشان كدة بيدوه فى اوروبا على صورة كبسولات زيت الكتان وانا شخصيا بحبذ اكل البذرة على بعضها مش الزيت بس لاسباب كتيرة مش عاوز اصدعكم بيها ..بيدوه برضو فى حالات الصداع النصفى لنفس السبب
* لمنع ضعف العظام وهشاشتها اثبتت الابحاث فعاليه بذر الكتان بما يحتويه من اوميجا 3 الللى قلتا عليها ...وده بميكانيكية معقدة شويه بلاش نحكى القصة دى لانى بحاول قدر الامكان مزهقكمشى بصداع التجارب و الابحاث وكدة اللى يهمنا ان كل واحدة خايفه على عظمها وبالذات االواتى داخلين على الاربعينات يكترو منه فى وجباتهم ..
*الظريف كمان ان التجارب قالت انها قللت احتمال الاصابه بالجلطة فى المتطوعين بنسبه عاليه جدا ودى حاجة تهمنا جدا بالذات للبدينات المعرضات لكدة ...علشان نصوت لبرنامج التخسيسس هههههه
*للمحافظة على نضارة بشرتك اثبتت الابحاث فى اكثر من مركز للبشره انه بيزود مرونه الخلايا ونضارتها ..وده شىء يهمكم طبعا ..
.......كفايه عليكم كدة انهاردة علشان متقلشى عليكم و تزهؤا من كلامى ...هكمله المرة الجايه ياذن الله ...وهقولكم استخدامه الصحيح و محظوراته القليلة لانه امن و الحمد لله ...وليه رجاء عندكم جميعا ...بلاش ارجوكم الفتيا فى مجال الاعشاب يا جماعه بسهوله علشان خاطرى ...احنا علشان نحلل مكونات عشب ممكن نقعد تلات او اربع شهور وعلشان نحقق فايده حاجة لازم نقرا لما نعمى ونتابع حالات ...
ودمتم سالمين

استكمالا لموضوع بذور الكتان ...وياريت يا جماعه بس نستنى نخلص الموضوع وبعدين هرد على كل التساؤلات حتى لا يضيع الموضوع :
* بذور الكتان تخفض ضغط الدم باستمرار الاستخدام ...وده تجربه اجريت على عدد كبير من المتطوعين خلا 6 اشهر فى جامعه فى اليابان و غيرها ظهر تحسن ملحوظ فى ضغط الدم ...مش هيبقى صعب عليكى انك تاخدى معلقة كبيرة من بذور الكتان الجيدة الطعم صباحا و مساء كمكمل غذائى علاجى ...و الناس كلها دلوقتى بتاخده بس للاسف العرب ادمنو الكيماويات المهلكة .
* بذور الكتان تخفض مستوى الكوليسترول ..فى تجربة جميله على عدد من المتطوعين ..اعطى تناول بذور الكتان فى الدايت بمعدل (20 جم يوميا) وده المعدل الجيد اللى معظم الناس بتاكده ..اعطى الكلام ده نتيجة مشابهه للى اعطاه عقار الفاستاتين (زى الليبيتور مثلا ) ...بصراحة حاجة ممتازة ...وعلى فكرة كتير قوى من الاغذية بتدى نتائج مشابهه للادويه باستمرار الاستخدام بس احنا نايمين ...وخليهم يمصو فى دمنا كمان و كمان ..
* بذور الكتان مصدر رائع للالياف ...طب يا عمى و احنا هنعمل بالالياف ايه .؟؟؟ شوفى يا ستى الالياف هتسهل الهضم ..مش بس كدة دى هتمنع الامساك وده بالنسبة لمرضى البواسير خاصة ممتازة ...الالياف تقى من امراض القولون العصبى و سرطان القولون و جيوب الامعاء ....دى كمان بتحسسك بالشبع فتساعد فى الرجيم ...(وده دور الكتان فى الرجيم و مشوفتش بحث بيقول غير كدة علشان بعض المقلدين بيقولو ده خرافه )...الالياف من الحاجات اللى بتقلل امتصاص السكريات من الامعاء زى مبتقول بعض الدراسات يعنى مفيدة لمرضى السكر ..عاوزة اكتر من كدة ايه بس ...طيب و الله كمان دراسة بتقول ان تناول الالياف بصورة مستمرة بتقلل الكولسترول (ده غير الاوميجا 3 اللى موجود فيه كمان ) و ده طبعا قلل فى نفس الدراسة من حدوث الاصابه بامراض القلب بنسبة عالية ....
## عاوز اقول معلومة تغذوية هامة جدا ....احنا عندنا نوعين من الاوميجا ((اوميجا 3)) و ((اوميجا 6)) ...مصادر التغذية العالمية بتقول ان على اكثر تقدير النسبة لازم متزيدشى عن 4 اوميجا 6 : 1 اوميجا 3 ....وكتير من خبراء التغذية بيخلوها 2:ا ...طيب يا عمى ازاى الكلام ده ....ببساطة الاطعمة اللى بتدى اوميجا 3 منها بذور الكتان و الجوز والكانولا و طبعا زيت سمك بالذات سمك المناطق الباردة .....و تخيلو اللى بتدى اوميجا 6 منها زيت دوار الشمس و البذور طبعا و زيت الذرة وزيت الفول السودانى طبعا و الفول نفسه والدهون اللى فى الحوم و كمان الزبدة ...متهيالى معلومة ظريفه ...يعنى يا ستى قللى شويه من اللى بيدى اوميجا 6 و كترى شويه من اللى يدى اوميجا 3
وكفايه عليكم علشان شكلكم دختم .....وصدعتم

اشكر كل اللى تابعونى بقرايه الموضوع او الرد عليه وطبعا الاسئله مطلوبه لانها بتفكر الواحد بشىء ربما يكون نسيه ..وياريت اخت تتبرع مشكورة وتجمع الموضوع و تنزله بعد ما يخلص كمعلومات اولا ثم الاسئله و الرد ..لانى بصراحة بحب اسلوب الملفات المتكاملة دى ...بس برجاء لو اتنقل نحفظ حقوق المخلوق الضعيف ده ...واوعدكم لو ربنا مد فى العمر بملفات قوية جدا ..واعتقد ان الجاى هيكون ملف عن الاعشاب و الشعر ...ملف كنت كتبته من فترة طبعا بعد تجربة واخذ ورد ...وبصراحة كان ممتاز ..اتمنى تقترحو ...طيب ..نرجع ونتكلم عن الهانم بذور الكتان...
* بالنسبة للرجال ..وكل ست عندها اكيد راجل فى البيت يا جوز يا اخ او غيره ..معظم الابحاث بتقول ان بذور الكتان وسيله فعالة فى الوقايه و علاج سرطان البروستاتا ..وفى طبيبة مشهورة فى اليابان ليها برنامج علاجى لعلاج ورم البروستات الاساس فيه بذور الكتان ..وكمان نفس الموضوع فى المانيا على يد دكتور شهير هناك ...ازاى بيشتغل وايه بيعمل طبعا مش وقته لان ده من الامور المعقدة و اللى تحتاج للدرايه بعلم مكونات النبات و كمان الكيمياء الحيوية ..اللى يهمنا ان كل ست هتحط على السلطة ملعقه من بذور الكتان يبقى بتقى جوزها مرض كل رجل معرض ليه وهو مشاكل البروستات ..وبالتالى بتقوى من كفاءة جهازه التناسلى .
* بحث مدهش فى المانيا بيقول الاتى ...الاكثار من بذور الكتان كمكمل غذائى يعالج ...وخلى بالك من يعالج دى ...مرض جفاف القرنيه وده مرض مشهور بتحمر فيه العين ويبقى صاحبها مش قادر يفتحها ((راجع مع طيبيب)) ..وطبعا بيد فى الحالة دى قطرة مرطب او دموع صناعى ((لوبريكانت)) ودى غالبا وقتيه ...طيب ليه منجرب مكمل غذائى مفيد و عشبى وامن و صحى ...برضو مع القطرة .. لانى دايما اقول يا جماعة طب الاعشاب طب تكميلى اوعى تسيب علاجك وتدوس فى الاعشاب ..حبة حبة ..لحد متشوف اثر العشب بدأ ساعتها ممكن نسحب الكيماوى ...طبعا ممارس الاعشاب لازم يكون على علم باللى بتاخده من ادويه ..وكمان طبيبك لازم يكون على درايه باللى بتاخده من مكملات غذائية ...وفى العالم المتقدم ((اللى هو طبعا مش العربى)) بيتعاون مختص الاغذية مع الطبيب مع الصيدلى كلهم كفريق واحد ...بس نقول لمين ...المهم ..اى حد بيعانى من هذا المرض او معرض ليه يستفيد من هذه البذور الامنه ..
بصراحة مش هقدر اطول اكتر من كدة لانى بخاف تزهؤا ...وبعدين تفصلونى من المنتدى ....شكرا لكم .....................ودمتم سالمين

بدايه لازم نعرف ان بذور الكتان بتحتوى على اعلى نسبة من ((اللجنان او اللينان)) ..طب ايه دى ..ببساطة جدا دة مركبات طبيعية يتم تحويلها او تكسيرها فى جسم الانسان الى مركبين تانيين همة (( انتيرولاكتين + انتيرودايول)) طب وبعدين ..اهم حاجة تعرفيها سيادتك ان المركبين الجداد دول يشبهو الى حد كبير جدا فى تركيبهم الكيمائى تركيب الاستيروجين و مشتقاته الفعالة فى جسم المرأة..يعنى يشبهو الاستراديول مثلا وده مركب استروجينى فعال فى جسم المرأة...هتسأل سائلة وتقول طيب افهم من كدة ان دول زى الهرمونات ...اقولك تمام ....هتقول اخت تانية ...يا نهار ابيض تبقى خطيرة ...اقولك لأطبعا ...بالعكس دى مفيدة ليها منافع الهرمون و ملهاش اضراره ..طيب ازاى ..شوفوا يا جماعة حد جرب يحط مفتاح فى الباب يدخل و ميفتحشى ...طبعا اكيد حصل ...هوة بالظبط كدة المركبات المشابهه للاستروجين تتعلق فى مستقبلات الاستروجين بس متحلش محله ببساطة جدا ...يعنى بتخدع الجسم ..تسد مكان المفتاح الاصلى (الاستروجين ) فكده ناخد مزاياه بس متفتحشى ..يبقى مناخدشى عيوبه ..نفهمكم بالحالات بقى ونبقى بنقول فايدته فى نفس الوقت بس استحملونى وركزو زى مبتركزو فى خلطات التخسيس العجيبة ..
## مثلا فى حالة هشاشة العظام فى سن ما بعد انقطاع الدورة ..طبعا السبب المعروف هوة عوز الاستروجين ..نقصه يعنى فى الفترة دى ..يبتدى يحصل ان يخرج الكالسيوم من العظم للدم فيقل كثافه العظم فيحصل هشاشة ...الطب التقليدى بيدى مركبات استروجينية ..طيب لو دخلت مركبات بذور الكتان للدم هتتعلق بمستقبلات الاستروجين فتخدع الجسم ..يحس انه مفيش نقص فى الاستروجين فبالتالى تقل نسبة خروج الكالسيوم من العظم ,,فيقل معدل الاصابه بالهشاشة ...ده ببساطة ..يبقى له اهميه كويسة جدا فى الوقايه من هشاشة العظام
## مثال تانى فى نفس السن برضو وهى الاعراض المصاحبة للسن ده من حرارة و عرق و احمرار فى الوجه و عدم ارتياح ..كل ده سببه ان الاستروجين بيبتدى يقل من الجسم ...تعمل المركبات اللى فى بذور الكتان بنفس الطريقة ..تخدع الجسم وتتعلق بمستقبلات الاستروجين فتقل الاعراض تدريجيا ودى نتائجها كويسة جدا تصل الى تحسن 60% وده مؤشر عالى جدا فى الاحصائيات العلاجية ..طبعا فى اعشاب تانية هنبقى نتانولها ان قدر الله ..
## الاقوى و الاجمل ان تناول اللجنان ( اللى فى بذور الكتان )) فى بحث اجرى فى امريكا و المانيا حتى فى مستشفى ميوكلينيك الامريكية ..ثبت ان الستات اللى بيتناولو حوالى 25 جم يوميا من بذور الكتان فى وجبتاهم احتمال اصابتهم بسرطان الثدى اقل بنسبة و اضحة جدا من اللى ماخدوهاش ودى بيحددوها بمؤشرات تبين احتما حدوث سرطان من عدمه وبتكون فى الدم ..يعنى كل الستات فى سن الياس او غيره يقو نفسهم من احتمال الاصابة بسرطان الثدى بمجرد انهم ياخدو معلقة الصبح و بالليل من بذور الكتان المطحونه ..متهيالى وصفه سهله
## حاجة روعه تانية ..والابحاث جارية عليها ان اللجنان دى و الموجوده فى بذور الكتان ..بتزود معدل التبويض عن طبعا الاستروجين هوة المسؤول عن تخلق او يعنى انقسام البويضة (لو صح التعبير ).....ودى وظيفه ((الكلوميد )) الكيماوى بيسموه محفز للتبويض و اللجنان ممكن تكون نفس الاسلوب
## اخيرا ..وجدا ان نفس الخصائص فى اللجنان ..بتعدل من اضطرابات الدورة فى السن المتاخرة ...و الابحاث فى ده مازالت جارية (( اصل الناس دول مشغولين بالابحاث مش الخناقات و المعارك الداخلية)) ..
...طبعا صدعت دماغكم بس و الله الموضوع شيق و نفسى كل الاخوات يقرو فى المجال ده بس بدراسة و تأن و علم ....مش خرابيط زى ما الاخوات السعوديات بيقولو .....وكفايه كدة فى بذور الكتان ........اتمنى تكونو استفدتم ,......ودمتم سالمين